因為國際賽期，今個周中歐洲主要聯賽同盃賽都全面休息，收費台直播世青盃，原本口淡淡嘅球迷都叫有啲寄託，不過如果係睇波又賭波嘅球迷，尤其是捧開上盤嗰班，16強淘汰賽簡直係噩夢開始。
周一兩場16強已經爆晒冷，臨場瘋狂落飛嘅西班牙U20同巴拉圭U20，都分別不敵意大利同南韓出局；上盤客以為周二會轉勢，尤其是主辦國埃及喺首都開羅出擊，對住分組賽只得3分、掹車邊以第3名出線嘅哥斯達黎加，一眾波友都認為主隊冇得輸，主W由1.57倍打到去1.38倍，「讓球主客和」嘅「主勝」亦由2.55倍落到2.05倍。
哥斯達黎加淘汰埃及
點知上半場客軍後衞荷西文拿先開紀錄，換邊後埃及㩒住攻，但不單未能追和，完場前2分鐘俾哥軍一次突擊得手，由烏連拿埋齋，以2:0將東道主踢出局，爆出6.5倍客W。
埃及呢場冇直播，對波友可能更加係好事，因為唔使追即場投注，唔係盞越輸越多；早場加納對南非又係輸怕人，加納3戰取得7分，以D組首名出線，對住F組第3名出線嘅南非，牌面高晒，臨場又係瘋狂落飛；主W由1.55倍跌至1.38倍，「讓球主客和」嘅「主勝」又由2.5倍跌到只得2倍。
加納加時贏南非晉級
點知加納表現唔對辦，南非下半場更靠艾拉斯穆斯先開紀錄，加納苦戰之下，先靠阿休頭槌追平，法定時間和1:1，爆出2.8倍「客勝」同4.3倍和波；好衰唔衰，加納加時先由艾迪耶亞射入「世界波」，2:1反勝晉級8強，球員就開心，捧場客就傷心。有睇過直播嘅波友，相信同我求大俠一樣有同感，世青盃唔少球隊快就係快，體力都好好，但球員踢嚟冇章法，個人主義又高；強隊同弱隊差距冇想像中咁高，盲目捧熱門，不如留番啲子彈周六賭大國腳好過。