商務及經濟發展局前局長馬時亨以健康理由引退，休息咗成年時間，終於重出江湖，做電台嘉賓主持，轉型做名嘴。
離開官場後，肥馬專心調理身體，堅持日日做運動，日子有功，家陣體形已經好fit，有啲冇見一排嘅老友碰見佢，都話唔認得，因為佢好似細咗成個碼。財爺鬍鬚曾日前因突發性心臟病入院做手術，好彩執番條命，肥馬係過來人，知道高官工作壓力大，應酬多，平日少做運動，對身體唔多好，所以建議喺政府總部設立健身室，方便高官做運動。
D型性格高危
做gym對健康有好處，不過中大學者話性格都可以影響健康，佢哋研究發現近年社會上出現一種新性格特徵，可稱為「D型性格」，「D」係指「憂傷」（Distressed），學者認為有此性格特徵嘅人，成日會對人懷有敵意同感到焦慮，面對壓力時會作出過份反應，處身群體時，亦會感到侷促不安同渾身唔自在，咁樣會增加心臟病風險，唔知鬍鬚曾係咪屬於D型性格呢？