休息近一星期終於復工嘅鬍鬚曾，噚日朝早出席行政會議時神采飛揚，康復進度似乎唔錯。佢多謝各界關心，唔知後來知道立法會雷曼小組12月要傳召佢時，係咪一樣笑得咁開懷？
為免過度操勞，鬍鬚曾表明未來兩三星期唔會外訪。早前強調本港已走出金融海嘯陰霾嘅佢，唔怕外界再插佢過於樂觀，力撐香港經濟露出曙光，但強調仲有好多工作要搞，又自信能夠帶領香港步出困境，似乎對自己嘅體魄充滿信心。
傳召出席雷曼聆訊
但八方戥佢擔心，事關立法會雷曼小組喺佢復工首日，就送上大禮，議決喺12月11日同18日，傳召鬍鬚曾應訊，解釋佢作為特區最高財金官員，喺雷曼事件上做過乜？小組主席何鍾泰就唔驚大病初癒嘅鬍鬚曾撐唔住，仲讚鬍鬚曾睇落好鬼醒，唔使替佢擔心咁話。而喺傳召財爺之前，雷曼小組會再度傳召證監會行政總裁韋奕禮及金管局副總裁蔡耀君。
過往喺雷曼小組發炮最勁嘅甘威受求愛不遂事件影響，頻頻缺席立會會議。噚日雷曼小組開閉門會，佢都冇出現。