大劉劉鑾雄前晚於灣仔福臨門舉行家庭喜慶飯局，除母親、弟妹外，就連罕見的兒子劉鳴煒也帶同太太Wendy現身。不過，前晚大劉棄甘比（陳凱韻）選呂麗君陪同出席飯局，今次爭寵成功，又難怪穿到紅彤彤的呂麗君笑到四萬咁口，一副勝利者模樣。
劉鑾雄日前中秋節「點燈」甘比，與她及小女兒秀樺、母親等到灣仔福臨門飲茶食晏，大劉離開時還罕有地抱住秀樺，一家三口好不溫馨。至前晚終於輪到呂麗君，今次飯局除大劉母親、胞妹劉玉珍、胞弟劉鑾鴻（細劉）及弟婦Linda外，連罕有陪大劉到福臨門開餐的兒子劉鳴煒及新抱Wendy也有出現。
三代同堂紅彤彤
雖然呂麗君未有帶同女兒秀盈，劉鳴煒的一對龍鳳胎及大劉女兒劉秀融也未有出現，但以前晚劉家三代同堂陣容而言，已是相當熱鬧。而前晚大劉棄甘比選呂麗君出席如此重要的家庭聚會，足見呂麗君地位未受動搖。
前晚9時15分，大劉與呂麗君及母親等晚飯後離開福臨門，呂麗君一身紅色連身裙打扮，大劉新抱Wendy穿粉紅上衣，而大劉母親、胞妹劉玉珍和細劉太太Linda亦分別穿上粉紅及紅色花衫，一家女人紅彤彤打扮，估計是有喜事慶祝；其間劉玉珍拿着一個印有「壽」字的紙張，未知前晚會否是大劉母親還是大劉擺壽宴。
現場所見，劉鳴煒小心翼翼扶着嫲嫲落樓梯及上車後，便與太太Wendy登上白色七人車離開，見Wendy手上拿着一袋打包食物，十分貼合夫婦二人知慳識儉性格。
呂麗君心情靚爆
至於獲大劉「點燈」安排出席重要家庭飯局的呂麗君，全程笑到四萬咁口，她與大劉登上48號車牌平治離開時，更如小女孩般蹦蹦跳，今次撼低甘比爭寵成功，難怪心情靚到絕。
採訪、攝影：李志明、朱志聰