宋林自從做咗華潤集團董事長後，華華都好難冇見到佢，記得上次見佢已經係今年2月，佢哋舉行嘅新春酒會兼華潤希望小鎮基金成立儀式。噚日華潤水泥（1313）上市，宋林當然要現身嚟撐場，華華趁機同佢傾幾句；宋林話潤泥04年負債高兼市值細，唔夠錢擴產，俾集團私有化後，經過幾年壯大再上市，佢叫傳媒實在應該搵潤泥個女主席周俊卿好好傾吓呢個Case。
華潤海南搞希望小鎮
不過華華冇你咁好氣，事關冇華潤集團背後支持，華潤水泥又點可能大得咁快？倒不如講吓佢哋個希望小鎮有乜進展好過啦！
宋林亦冇托手踭，佢話首個設喺廣西百色嘅希望小鎮，已喺9月20號落成，家華潤開始喺海南島石海灣做第二個；同第一個一樣，由集團屬下子公司員工將各自專長帶過去，幫當地貧困偏遠地區居民建新型小鎮，同時為佢哋揀合適嘅優良種子同種豬，等到有收成時就由華潤採購。家企業講求社會責任，華潤呢啲善舉應該值得表揚嘅。