堅持以招股價上限3.9元上市的華潤水泥（1313），開市即穿招股價，為求體面，即時有買盤力谷，並成功於上市儀式中谷上招股價樓上，管理層被問到是否定價過高時，回應話認購反應熱烈可見大家覺得估值合理喎。
股價冇插水，管理層開心理所當然，但細心想想，是誰定出天價招股，又是誰堅決不理市場反應，要賺到盡以上限定價？
唔係話新股上市一定要益街坊，但有唔少人借孖展入大飛抽，結果竟然分貨多過預期要補孖展，一邊蝕息，另一邊蝕埋價，新股連些少水位都唔留嘅後果大家有眼睇，打沉埋其後上市嘅新股簡直係累街坊。最慘要數寶龍地產（1238），大削招股價44%，仲要冒散戶抽飛嘅風險。可惜唔俾新人加入，否則以8倍PE入飛呢間「內地希慎」確係抵買，相信唔使破底之餘，仲有水位走吓。
新股冇水位易破底
聽講寶龍根本唔等錢使，平啲上市當益街坊，同其他要賺到盡嘅新股，例如30幾倍PE上限定價，伸手攞成126億元的永利澳門（1128）比，邊個有良心大家心中有數。
其他半新股又點？還記得7月上市的金隅股份（2009），首日升近60%，上錯車的只能怪自己高追，因為上到10蚊時PE已屆25倍，剛好同潤泥招股水平一樣。但定價6.38元，即16倍PE相當克制，難怪高位回落三成後，一直穩守招股價。
社保基金於上市後兩度減持合共超過3%後，原來最近國壽集團密密吸，上市至今4度增持，持股量已超過9%，早已食晒社保基金早前減持嘅貨有餘。股價9月都係做緊8.5元樓上，即係話國壽集團都要坐，現價相當於11.5倍PE，雖然基本因素唔及安徽海螺（914）甚至潤泥，但勝在夠平，加上技術指標皆止跌回升，即使要坐都有國壽陪，唔使咁驚。若然股價短期升破埋8蚊，前程一片光明。
有異動嘅又點止條金魚，光滙石油（933）主席薛光林本身已揸住超過70%貨，上個月仍8度增持，平均價3.8元，同現價只有9%溢價，貨源咁歸邊，股價即時創新高，睇嚟好戲在後頭。
胡孟青