無錯！背景風景都好有奪寶奇兵感覺，有美相伴又係鐵金剛方程式，玩過體驗版更明白搵掩護匿埋重要性，加上操作都似《MetalGear》，所以，就係炒埋一碟。不過好嘢唔怕學，玩過第一集都知水準有幾驚喜，第二集畫面更強，網上玩法更多，邊個話雜扒飯、滷水拼盤唔好食？
文：阿洛
超強繪圖 冰火奪寶
由頑皮狗（NaughtyDog）開發嘅《Uncharted》第一集口碑極佳，尋尋吓寶變打怪獸故事，驚喜度拍得住《殺出個黎明》，已經成為PS3獨佔籌碼主力。睇埋第二集條片兼試玩過之後，畫面真係冇得彈，採用經強化嘅NDE2.0遊戲引擎，3D繪圖物理模擬效果及互動性更強，背景細緻程度直逼播片質素。故事講上集主角寶藏獵人NathanDrake為追尋傳說冒險家MarcoPolo失落嘅艦隊之謎而展開冒險。有喜馬拉雅山脈嘅冰天雪地，又有尼泊爾戰區，而且場景設計勁壯觀，好睇過戲。
打個觔斗 符碌射頭
今集更多新增動作，邊爬邊開槍，擒住崖邊仲可以單手拉崖上的敵人落山，殺人乾脆利落！而瞄準敵人時嘅對焦效果亦好有真實感，不過同敵人往往會離成條街駁火，普通機關槍亦Zoom唔到好近，想一下爆射，彩數多於一切。
連線合作 匿埋唔覺
提提性急機迷，歐美網站已經有得下載體驗版，而內容就正係今集重點—網上合作及對戰模式。可以多人合作完成任務或10人對戰，仲有奪寶戰等搶旗仔玩法。而今集搵掩護亦超級重要，一味駁火，累人累己滋味盞餘生也記起。行埋牆邊按○掣就會自動掩護，再按L1就鬼祟瞄準，直接按R1就伸支槍出去亂射，你仲可以揀做甄子丹，衝出去一個打十個，殺呀！
Profile
遊戲：《Uncharted2:AmongThieves》
機種：PS3
製作廠商：NaughtyDog
類型：動作
人數：1人-10人
推出日期：10月15日
