NBA季前賽、家嘅「歐洲之旅」，為一眾籃球員提供極佳機會「見吓世面」、開拓眼界；講緊嘅係公牛同爵士，去咗英國倫敦睇英超！佢哋睇到興奮大叫，唔知仲以為呢班「波（波者，籃球也）兒」係鄉下仔，唔係班坐擁千萬美元年薪嘅球星！
公牛新秀驚見阿仙奴
大部份公牛球員上周六喺阿聯酋球場，睇住阿仙奴6:2大炒布力般流浪；阿仙奴喺場比賽度攻勢水銀瀉地，視布力般防守如無物，睇到想喺新球季發圍嘅公牛球員「金睛火眼」！未試過親身睇英超嘅新秀泰吉遜（TajGibson）就激讚兵工廠：「真係一場非常刺激嘅球賽，今次飄洋過海嚟英國，見識到佢哋真係咁愛足球！」
公牛後衞戴歷路斯就「離群」去咗睇車路士，咁啱爵士球員都去咗撐車仔，唔通戴歷路斯想喺周二場NBA熱身賽賽前試探軍情？其實爵士嘅迪朗威廉士、奧古同高華去睇車仔，都係俄羅斯前鋒卡里倫高「搞鬼」，皆因車仔班主係俄羅斯嘅阿巴莫域治，卡里倫高就好自然愛上車路士；而睇住車路士主場贏利物浦2:0，「AK47」就可以喺隊友面前耀武揚威一番，證明自己眼光冇錯！
卡里倫高為阿巴撐車仔
至於喺倫敦長大嘅公牛前鋒丹治，就唔似得泰吉遜同卡里倫高咁興奮，話晒佢見慣呢類大場面，都係集中精神周二晚喺O2體育館表演好過；但入場睇波都唔平，最貴門票350英鎊（約4,300元港元）。老老實實，英國人平時冇睇開NBA，丹治同班隊友真係要打番場好波，搞到英國班球迷大呼小叫，咁就鄉下仔都可威番次啦！
鄉下仔除咗公牛同爵士嘅球員，馬刺後衞柏加周一喺美國參加球隊嘅高爾夫球慈善賽，揮桿渣到無倫，無晒平時喺球場逢人過人嘅威風樣，睇嚟佢平時都要充實吓自己喇。