烈女楊千嬅表面儍更更，其實密底算盤打得響，先有千揀萬揀覓得如意郎君丁子高，昨日又大賺一筆，以6,800萬天價售出物業富豪海灣。據知千嬅於03年底以3,800萬購入該單位，才6年一轉手已勁賺3,000萬，高楊伉儷今次真係笑到見牙唔見眼。
現年35歲的楊千嬅貴為樂壇天后，年賺過千萬，身家逾億，多年來其物業只有價值近7,000萬的富豪海灣獨立屋作自住，以及投資三個各逾千萬元的澳門樓花。樓唔使多最緊要眼光準，昨日地產界傳出消息，指千嬅成功以6,800萬售出其富豪海灣物業，比03年買入價高出3,000萬，一鋪賺個盤滿缽滿。今次千嬅決定出售富豪海灣，未知是否為了夫婿丁子高，兩人婚後分別住在赤柱和跑馬地，皆因丈夫揚言不會入住千嬅的豪宅及分其身家，故有傳兩人在愛都大廈另築愛巢。
「人生第一層樓」
位於赤柱黃麻角道的富豪海灣，03年落成，千嬅購入的單位據知是排屋單位，面積約4,000多呎，另有1,200呎天台花園，客廳及兩套房均可飽覽赤柱灣全海景。查實富豪海灣這個單位對千嬅來說別具意義，02年7月她以近2,000萬由華星轉會新藝寶及金牌經理人黃栢高旗下，當時她已公開表示想買樓送給雙親，揀足一年才選中富豪海灣排屋，買入價高達3,800萬，據知首期連雜費，一次過要付近1,500萬，難怪她曾說：「真正喺30歲前做得到嘅轟烈大事，就係喺富豪海灣買咗人生第一層樓。每個人都有目標，呢個係我對父母嘅承諾，今次買樓用晒我畢生積蓄。」
估計逾億身家
其實千嬅與家人原本同住土瓜灣，走紅後住址曝光，經常有fans找上門令家人不勝其煩，孝順的千嬅才決定獨自搬到堅尼地道皇朝閣自住，03年購入富豪海灣後，一家又齊齊整整慶團圓，而千嬅自搬進新居後，星運日隆越住越發，片酬勁升，07年再以4,000萬元轉投東亞旗下的Amusic，估計身家逾億。撰文：FayeLam