唔知係咪因為大摩幫國際資源（1051）配股做安排行，冇人信佢喺上月兩次為呢間公司出唱好報告嘅客觀性，大摩吹極摩笛都冇乜人理，9月底金價都升番上1000蚊美金一盎斯啦，噚日仲衝上1036蚊美金歷史新高，但係呢間話執平貨買咗個好平嘅印尼金銀礦嘅國源，股價反而越行越低，你話係咪好奇怪呢？
出咗份12頁報告
為咗要再撐股價，國源上星期搞咗個印尼Martabe金銀礦分析員實地視察團，里昂兩個資源股分析員唔單止有去，仲影埋好多相擺喺佢哋出嘅報告入面，報告話個礦越探越深，發現礦內平均金銀含量都有增加，之但係呢個礦有個好大問題，就係位於印尼地震活躍帶蘇門答臘，呢處04同07年發生過地震同海嘯，剛剛上月30號距離礦區300公里又發生7.6級地震，佢個尾礦庫能否按期建成係一大疑問。
雖則里昂幫佢哋整咗份12頁報告，但罕有地講完一大輪而冇畀投資評級同目標價，投資者如果想買，就真係U諗U嘞。