十月一日放假，一早起身預備睇電視直播北京大閱兵，開始睇報紙冇耐，已收到商人A來電，乜咁早呀，原來佢晨早去咗金紫荊廣場參加升旗禮，來電問：「點解見唔到你？」佢認真畀面，左丁山邊度有咁嘅面子、地位，值得特區政府邀請出席呢啲盛會呀？商人A話大概好多高官上咗北京，今年見到好多副局級人馬，及一啲唔上京嘅商界要人。咦，不受邀請上京，係唔係「要人」呢？商人A話：「不能以偏概全，有啲朋友好怕到天安門罰企六七個小時，因為七點半要上巴士，即係話六點半左右起床，大概去到下午一時先至可以離開。一位老人家驚住要着埋紙尿片，所以婉拒唔去囉。」
咁又係，留在香港家中睇電視直播雖無現場氣氛，但已經體會到大場面，大製作，大中國氣魄，咁盛大嘅閱兵，全世界只有中國可以做得到。電視所見之軍事武器及兵士方陣，軍容鼎盛，士氣昂揚，確是威武之師。十八世紀初，滿清中國係世界強國，相隔三百年後，中國重新呈現大國之風，可喜可賀。
但大場面之後嘅小場面就顯示出中國仍然缺乏信心，防民甚於防川，一切慶祝運動集中於天安門，唔見全國各大城市有大活動嘅？國慶唔係普天同慶、四海歡騰嘅日子咩？為乜公安要驅散街頭群眾，唔准有人民自發性慶祝活動？冇咗人民自發參與，張藝謀傾全力營造之大騷，只能講話係有軀體，無靈魂，一切顯得十分機械化，唔見有人文色彩，遑論人文價值。閱兵行列出現不少標語，最令人留下深刻印象嘅唔記得邊個單位高舉：「忠誠於黨」四個大字，點解唔係傳統嘅「精忠報國」或現代術語「忠誠於國」呢？十月一日是中華人民共和國國慶還是中國共產黨黨慶？彭真生前留下一句名言：「黨大還是法大？」答案明顯不過，中國永遠是黨大。
睇電視睇到十二點要離家去馬場之時，接到廠家R電話問有冇心水貼士，左丁山問：「你唔係返咗南海預備今日為新餐廳剪綵嘅咩？」廠家R話：「本來係嘅，我佔股份嘅餐廳擇日開張，以為在十月一日食正黃金周開張最好，點知上面拍嗱話接到通知，國慶日不准有任何活動，餐廳也不能開張，故此諗諗吓都無謂上去咯，不如留港去馬場！」國慶日管得咁鬼嚴，唔怪得報紙話北京市民有麻木感覺，正是只許京官賀慶，不許百姓狂歡。