現年25歲的徐淑敏（Suki）下月披嫁衣，昨日與未婚夫黃浩（Kenny）在羅浮宮拍攝婚紗照，大肚的Suki刻意挑選低胸婚紗來轉移視線。這位發福準新娘心情興奮，不時展現甜笑，Suki還表示嫁妝是家裏的三隻貓。
徐淑敏和未婚夫黃浩下月中結婚，並會擺三日喜酒，二人近日忙於籌備婚事，昨日一同到九龍塘羅浮宮拍攝婚紗照。懷有身孕的Suki趁空閒時躺在梳化休息，看似十分疲倦，她直言：「我揀咗四套婚紗影相，估唔到單單一套就要影咁多相，平時下晝時候我係瞓緊晏覺。」
未婚夫甜言蜜語
雖然Suki十分疲倦，但提起披嫁衣扮靚時仍醒神地說：「前晚同朋友BBQ，但都好夠瞓，朝早起身都有敷面膜同按摩去水腫。」她形容現時待嫁的心情好像放大假一樣，胃口也不錯，難怪身形隨之發福，上圍也明顯升cup，她笑說：「你哋高角度啫。」
Suki還大爆未婚夫Kenny看到她穿上婚紗後，大講甜言蜜語，她說：「佢讚我靚，仲話除咗可以食好嘢開心外，最開心係娶到個靚老婆。」冧得Suki見牙唔見眼，當傳媒要求兩人親嘴，Suki隨即施冧功主動錫Kenny面頰，然而男方則尷尷尬尬。
為戴金飾着旗袍
Suki昨日身穿婚紗完全將肚腹遮蓋，她表示胸、腰部位都要修改，但她仍不肯公開承認有喜，Suki透露嫁妝會有龍鳳鈪，也渴望有金豬，她說：「本來我冇打算着旗袍，但為咗戴金飾都會着，我冇諗過啲嫁妝用嚟做乜，反而諗自己嘅嫁妝係帶埋屋企三隻貓陪我，因為可能會同老爺奶奶住，所以只會帶三隻。」
採訪：卓寶花
攝影：林德雄、彭琮然
