獅子行滙豐銀行培育出唔少銀行大班，早喺06年推出嘅「滙豐理財小百科」，就係為咗提升年輕人對財富管理嘅關注，其中一項活動「少年財務策略師大賽」噚日結束，結果由喇沙書院勝出，一眾喇沙仔喺師兄王冬勝手上接過獎狀。
呢個比賽今年已經第三屆，參賽學生揀選其中一個由滙豐提供嘅家庭理財個案進行分析，因應個案嘅財務需求，提交一份財務計劃書。
今年獅子行合共收到65份計劃書，呢個比賽其中一個吸引之處，相信同獎品有莫大關係，冠軍除咗可以獲得1萬蚊發展基金同埋一人一張獎狀之外，仲有兩日就業見習機會，跟住滙豐個人理財業務部財富管理業務團隊嘅職員返工，親身體驗銀行日常工作。
頻裁員 員工投入度反增？
獅子行除咗係本港最大銀行，亦都係本港最大僱主之一，噚日發表今年度員工意見調查報告，發現亞太區員工投入度升到去71%，比舊年高出兩個百分點。唔好睇小呢個調查，獅子行今年中實行彈性上班時間、homeoffice等措施，都係透過呢個調查知悉員工所需o架咋。
今年調查顯示，員工嘅投入度，以「在滙豐工作引以為榮」同埋「會向別人推薦滙豐是理想的僱主」得分較高。舊年爆發金融海嘯後，獅子行幾番裁員，估唔到呢段期間，員工投入度不跌反升，唔通真係越驚被人裁，對公司嘅投入度先會增加？
李華華
mailto:[email protected]