理大設計學院出過唔少著名設計師，好似時裝設計師VivienneTam譚燕玉、攞埋奧斯卡嘅《史力加》動畫創作許誠毅、珠寶品牌Qeelin嘅創辦人陳瑞麟、著名設計師劉小康等等，近年喺國際上亦攞到唔少認同。繼07年獲美國《商業周刊》選為世界60所最優秀設計學院後，理大嘅設計學碩士（設計策略）課程，日前又獲呢本雜誌選為全球最優秀嘅「設計思維課程」之一，同內地著名嘅中央美術學院睇齊，成為亞洲區入選嘅兩所院校之一。
《商業周刊》話，呢30個全球最優秀設計學研究生課程，修讀嘅學生要同時學習美術、管理科學等科目，佢哋嘅設計唔只為美觀，仲係一種商業策略。