五日前，北京祭出阿爺、曾祖爺、曾祖爺個阿爺等畫像遊街示眾，又出動到海陸空飛機大炮，再來多幾十個兵哥娘子軍組成嘅方陣，打破咗黃帝同蚩尤以來嘅晒馬紀錄。四日後，中華兒女嘅地頭又有另一個所謂「國慶」，不過受8.8風災影響，莫講話閱兵，台灣就連官式慶祝活動都要取消。
明信片成政治宣傳
想當年，七、八十年代台灣仲係動員戡亂時期，軍事實力唔差得過大陸好多。香港嘅國民黨員林偉棠就保存住阿爸留低嘅一批明信片，呢兩輯明信片，係當年國民黨政府派畀去台灣參加雙十節嘅境外僑胞，用嚟做政治宣傳，展示台灣軍隊幾咁有台型，到家，兩岸嘅軍力就蚊髀同牛髀嘞。
不過，林偉棠認為台灣咁先係有進步，佢話當年台灣政府虛耗好多資源喺軍備競賽，但近年嘅民選總統已放棄咗窮兵黷武嘅思維，社會走向民主自由，人民可以兜口兜面狠批領導人。反觀中國大陸，縱有近百萬雄師，但係百姓生活毫無安全感，動輒得罪政府，上訪者甚至隨時性命不保。林偉棠話，都係做台灣人好過。