兩位賓架趙之EFG位於ICC的辦公室，擁無敵海景，自西九龍望維港與中西環景色，誠賞心樂事。香港望過九龍，其實冇九龍望香港咁靚，「君臨天下」能售高價，自有其原因。不過實際啲講。住在海景大宅，能有幾多時間在家望海景吖，但講起嚟，會有人彈我地吃不到葡萄，酸溜溜，不講為妙。
自ICC落「圓方」坐地鐵回中環，行過國金二期，碰到私人銀行賓架M，於是順口同佢講：「原來你地呢行嘅生意咁好嘅，唔怪得你成日咁好笑容啦！」賓架M話：「我對住所有人都會笑嘅，唔通苦口苦面咩。我地做呢行有苦自己知，有時要為客戶嘅仔女搵不同嘅補習老師教鋼琴、教普通話、教英文，總之乜都有，最近仲要為富翁愛兒搵國際學校㖭。喂，你有冇辦法幫忙下？」
聽見就趕快拜拜，鬆人。搵國際學校喎，攞苦嚟辛又未必有結果，自己唔係私人銀行家，關自己乜事。當然賓架M唔止為富有客戶（所有私人銀行家客戶都係富戶）嘅仔女解決問題嘅，最重要嘅就係幫客戶投資搵銀。賓架M喺呢方面係做得唔錯嘅，佢以前在美資大經紀行做期貨經紀，對商品期貨買賣確係有經驗與觸覺，譬如佢上網睇世界各地天氣圖，早就預測茶葉、糖、可可等期貨有機會炒起。
不過睇天氣圖未必一定準確，有消息就贏九成。近日閱《大公報》之郭鶴年訪問記，饒有趣味。郭鶴年呢位東南亞糖王透露在一九七三年，五豐行請佢幫忙完成周恩來下達之任務，在限定價錢內買入四十七萬噸糖運回中國。郭鶴年一方面拉綫幫五豐行在阿根廷、巴西、泰國買入四十七萬噸糖，另方面就在倫敦期貨交易所買入二十六萬噸期貨，價錢係每磅八十二英鎊。待中國買糖之消息公開後，倫敦期糖急漲至每磅一○五英鎊，於是郭鶴年賺入一大筆，但佢話係國家賺嘅，後來陳雲副總理知道後，大為讚賞，批准五豐行可從事期貨買賣業務，以賺取資本主義嘅「剩餘價值」！呢個故事告訴我們，如果知道中國買X買Y，而在中國掃貨之前，買定期貨嘅話，可以賺到笑！至於在二十一世紀嘅期貨交易所，呢啲算唔算內幕交易呀？要研究清楚先？