做女人難，做民主黨男人嘅女人更難。
政治人物爆出桃色醜聞，指定動作係同老婆十指緊扣出嚟「闢謠」。做得民主黨阿嫂，就要做好心理準備，隨時可能會有呢一日。八方咁講，唔係話民主黨男人個個都私生活唔檢點，只係歷史數據證明，民主黨阿嫂唔易做；昔有何偉途太太，今有甘乃威老婆。
甘威話老婆自願出席
前日，甘太現身，陪住自認衰猴急嘅甘威出嚟開記招，「澄清」冇因為求愛不遂而炒女助理。有傳媒事後報道，話全程粒聲唔出嘅甘太「黑面」。甘威為此喺噚日朝早嘅烽煙電台節目度特別強調，太太係自願陪佢出席記者會，仲話：「佢係全心全意出嚟呢個會。」
坦白講，你估個個女人都係人哋美國嗰個民主黨嘅希拉莉咩？女人去到咁嘅場口，面對傳媒之時如果仍然能夠揮灑自如、見招拆招者，佢就應該從政（或者佢本來就係從政）。
八方反而覺得，前日甘太至少喺打扮上有落過吓功夫，薄施脂粉之餘，指甲仲貼咗閃石，唔會一臉憔悴成個棄婦咁款；一身便服打扮，斯文得嚟唔會太過正式，畀人感覺係：單嘢碎料啫。
五年前，當時仲係民主黨觀塘區議員嘅何偉途喺選舉前夕，被東莞公安拉咗，話佢北上嫖妓，後來仲被判勞教半年。當時，面對如此打擊嘅何太黎鳳嬋，仍然一度想幫選情急轉直下嘅民主黨站台，準備喺造勢晚會上真情剖白，幫手谷票，只係後來頂唔順公安方面透過傳媒連日放料，才以身體不適、心情欠佳為由缺席，改由李華明嘅太座代言。到老公獲釋返港，何太又喺記者會上全程拖實患上牛皮癬嘅老公嘅手，表現得不離不棄，更一度用紙巾抹眼淚，場面超感人。
雖然話，香港民主運動唔似以前台灣或者一啲東南亞國家咁，唔少老婆因為從政嘅老公死咗或者坐監，要代夫出征走上從政之路，但做得民主派男人身邊嘅女人，都真係要有啲犧牲精神。你睇社民連陶君行十．一嗰日被警察落孖葉拉上警車之後，佢嘅另一半孔令瑜住個車窗哭成淚人，真係聞者傷心，要嘆一句好一對革命鴛鴦。
mailto:[email protected]