噚日八方喺網上見到唔少人轉貼一篇題為「牛下街坊遭遺棄單位內」嘅文，忍唔住click入去睇吓邊個咁冇陰功。原來篇文嘅「作者」係隻貓，同另一隻貓原本住喺牛頭角下邨第八座一個單位。牛下清拆在即，佢哋一心諗住跟主人搬去新居，點知8月中主人突然唔見咗，佢哋冇嘢食有水飲，身體越來越差，後來被捉咗去漁護署，再輾轉去到流浪貓舍暫住。
佢哋話，好彩有義工照顧，又畀藥佢哋食，醫番好佢哋，佢哋先唔使上天堂住。但佢哋唔少同伴仍然藏身喺牛下。佢哋希望，大家都能夠搵到一主有愛心有能力照顧動物嘅好人家，等佢哋可以安度餘生。個網址係 http://www.lienwingyan.net/cats/mary/index.htm。