森美小儀歌劇團噚日喺灣仔龍門酒樓宣傳，除咗森美同小儀反串之外，鄧麗欣（Stephy）、薛凱琪（Fiona）同王菀之都着晒中式禮服出現，襯晒現場舊式酒樓風味。森美話今次會探討o靚模同援交呢啲敏感話題，而扮大老爺嘅王菀之仲摸新抱森美個patpat，之後仲話連緋聞男友張敬軒個胸都摸過。
家升呢為公司一姐嘅Stephy被問到呢排公司多是非，佢就話唔好咁樣分，但佢都覺得唔知係咪公司風水唔好。講到側田已秘密剃頭，Stephy話：「我都問過同事，好似話係佢自己鏟，其實佢除帽我都見過吓，冇乜嘢。」
扮大妗姐嘅Fiona出場撒米搞到好似撒溪錢咁，真係大吉利是。講起緋聞男友房祖名話想做職業媒人，Fiona就話怕怕，因為覺得咁樣好尷尬，又提到朋友如果想介紹男仔畀佢識，千祈唔好畀佢知，因為一定醜死怪喎。
森美攞小儀着數
此外，森美小儀噚日接受電台訪問，講到早前有報道指森美老屈小儀喺《美女廚房》所贏到嘅3萬蚊，小儀話係真嘅，佢當日請森美做拍檔時根本冇諗過會贏，所以冇傾到點分賬。而森美指以往玩遊戲一向係五五，估唔到今次係三七，但佢一啲都唔介意，因為佢哋玩《係咪小兒科》時贏到嘅十幾萬獎金獎品仲喺佢手上喎。