內地著名blogger冉雲飛原本來港出席港大新聞及傳媒研究中心一個研討會，但日前喺成都機場被公安截住，嚟唔到。佢原本仲會出席今日一個新書發佈會，本書叫《中國猛博──新傳媒時代的民間話語力量》，內容包括近年內地blogger點介入重大公共事件，點發揮影響力等等。
本書由港大新聞及傳媒研究中心總監陳婉瑩以及報告文學作家錢鋼主編。佢哋邀請咗幾位內地著名blogger來港，冉雲飛係其中一人，點知成都公安「維穩」維到呢個地步。但咁都無阻冉兄繼續喺網上發言，噚日佢喺牛博網上點評一周新聞，特別講到香港警方處理支聯會十．一遊行嘅手法係咪立功心切，值得港人思考，又話香港記者喺內地採訪被打、周勇軍被大陸公安越境拉人等，香港未來嘅自由值得深切關注。