啱啱過完澳門採訪Type-RClub甩尾表演，幾年無去，先發覺今日嘅澳門真係完全改頭換面。同主辦單位之一嘅新康恒負責人Herman傾開，佢就慨嘆澳門人唔興換車，賣新車比香港有難度。原來澳門驗車期定為10年，比香港仲要多3年，換轉係我，都揸多幾年，唔心急換車啦。亦由於咁，仍然有大量棍波車喺街度行，唔似香港咁冷門。保險更係恨死香港車主，基本上你個底乾淨嘅話，八百幾蚊已經有晒全保，連NCB（保單免賠拆扣）都費事同你計，夠簡單。仲有澳門出名油錢同車位都平，所以近八成家庭都有架車或電單車，唔似香港咁，基本上你養得起架車，又無卡數纏身嘅話，幾乎已經可列入中產級別。
記者：徐影龍