財爺曾俊華出院過中秋，噚日追月之餘，不忘喺網誌度表揚做過護士嘅太太夠醒目，當日識得及時送佢去醫院，佢先可以大步檻過。鬍鬚曾話，入院令佢對生老病死有咗深一層嘅體會。但八方相信，佢估唔到嘅係今次心絞痛緊急入院施手術，可能曲線幫到其他病友。
擬設24小時「通波仔」組
鬍鬚曾今次喺90分鐘之內做到手術，執番條命，否則遲咗隨時連命仔都冇。佢入院以嚟，報紙、電視、雜誌突然多咗好多介紹心臟病嘅專題，令呢個名詞一度成為網上熱門搜尋，大家對呢個咁普遍嘅病多咗關注。
原來醫管局計劃緊喺幾間大型急症醫院成立24小時「通波仔」組，有病人要做手術可以即刻做，唔使等有人出事先死call爛call啲醫生返嚟，減低病人嘅死亡率。如果新措施推行到，鬍鬚曾今次病都病得有價值。
鬍鬚曾每逢星期日都會更新個blog，噚日篇文寫咗成千幾字，又多謝主診醫生李偉聯同其他醫護，又上載埋佢連日來收到堆積如山嘅鮮花、果籃、問候卡甚至武林秘笈嘅相，咪好操勞？又唔使擔心喎，因為佢上星期日緊急入院個blog照樣有更新，呢啲粗重嘢，自然唔使司長親力親為。