要成為好嘅中場，最緊要有風範、有級數同埋有眼光，不過，曼城中場艾利蘭（StephenIreland）似乎一一欠奉！我求大俠所講嘅，係佢對座駕嘅品味。艾利蘭唔單止唔識得欣賞名車，仲將佢哋改到鬼五馬六，而最新嘅「受害者」，就係價值26.4萬鎊（約350萬港元）嘅賓利跑車，艾利蘭堪稱「靚車殺手」！
話說23歲嘅艾利蘭早輪突然心血來潮，想向24歲嘅女友謝茜嘉路娜（JessicaLawlor）顯示自己有幾愛佢，於是豪花26.4萬鎊，買咗架全新開篷白色賓利GTC跑車俾謝茜嘉，架賓利都係2010年最新型號，而且由0至100公里，只係需要4.8秒，艾利蘭以辣車冧女，本來無可厚非。
車椅繡上愛的宣言
不過，周薪7萬鎊嘅佢認為咁仲未夠突出佢對謝茜嘉嘅愛，於是將車頭賓利著名B字標誌，改咗做JL（即謝茜嘉名字縮寫），連「軚鈴」都唔放過，要刻埋JL；跟住，又喺車嘅座椅繡上"ToJessLoveFromStephen"（給謝茜，愛你的史堤芬上）嘅「愛的宣言」，仲要用個心形嚟圍住，問你死未？
遭隊友嘲笑另類品味
其實，艾利蘭亂改名車嘅設計，早有前科，喺呢架白色賓利「遇害」之前，艾利蘭就試過將價值9萬鎊、喺四驅界出名性能好、馬力夠、有霸氣嘅黑色越野路華（RangeRoverSport），配上螢光粉紅嘅「軚鈴」、「鬼面罩」，同埋座椅，令人唔知好嬲定好笑。
另外，佢架原本係紅白色嘅8萬鎊奧迪跑車（AudiR8），喺被曼城隊友笑佢揸同市宿敵曼聯顏色嘅車之後，佢即刻將架車噴成代表曼城嘅白色同粉藍色，仲要整埋個超人油蓋。一名不願透露姓名嘅隊友話：「雖然艾利蘭對於車嘅品味，成日遭隊友取笑，但係佢一於少理，仲認為係隊友唔識貨㖭！」