自從重返香港樂壇後，孫耀威（Eric）嘅發展算唔錯，點知近來禍不單行，五官裏面眼、鼻同口竟然先後受傷要做手術，嚴重影響歌唱事業，不過，Eric仍然識得苦中作樂積極面對，果然夠晒正能量。
事緣早排Eric先發現聲帶出血，久醫不癒，所以去做詳細檢查，點知發現上年撞車時整傷個鼻，原來入面有啲組織未好番，連帶對聲帶都有影響，Eric聽取醫生意見決定做手術一了百了。
眼鼻仍腫
手術前，Eric早前約助手去溜冰當做運動，點知溜溜吓唔小心向前仆，當時Eric以為冇乜事，點知助手再望真啲先發現佢流緊血，連頭巾都變晒紅色，即刻送咗Eric去醫院。醫生檢查後發現原來佢眉骨爆咗，啲瘀血甚至滲咗去隻眼度，即時縫咗十幾針，認真慘情。
眼傷未癒嘅Eric日前仲做埋鼻手術，家康復之中，好彩佢一早同譚詠麟、陳奕迅等為唱片公司嗰首《人人英雄》合唱歌錄咗音，咁就冇阻礙到其他人嘅進度，但因為Eric眼同鼻仲腫緊，仍未知聽日可唔可以出席環球「Uni-Power」記者會。