噚日「立法會議員天主教監察組」派發一年一度嘅成績表，嚟個懶蟲大檢閱。邊個議員成日玩失蹤、邊個喺議事堂遊魂發夢，即刻無所遁形。結果，發叔、小霍、金勞詹繼續冧莊蟬聯懶蟲寶座；新丁黃國健、梁家騮同謝偉俊成績都係劣等，成為新晉懶蟲。雖則人在做，天在看，但大部份都係來自功能組別，市民奈佢哋唔何。
監察組每年公佈議員考勤紀錄，今次點名譴責發叔同小霍。發叔繼續做包尾王，由98年立法會成立以來，從來冇提出過動議，出席率亦見紅。小霍都唔好得幾多，連續八年冇動議。金勞詹平時牙擦擦，原來喺議會五年都冇提過動議。黃國健雖然係直選議員，但係過去一年都冇提動議，只有一次休會辯論咁大把，表現仲差過好多功能組別議員。
有啲議員為咗做靚盤數，間中蒲頭，出席率唔低。但監察組發言人許煒斌話，有幾個人一投票就忽然失蹤。過去112次記名投票中，寶哥哥有93次不投票紀錄，謝偉俊、梁家騮、金勞詹都有50至60次，「唔知係去咗後面飲茶，定係瞌眼瞓。」監察組特別點名批評謝偉俊同梁家騮，話佢哋經常迴避政治性議題。謝偉俊喺永久取消外傭稅同六四都冇投票。梁家騮喺截取通訊、落實一國兩制等議案都冇表態。
劉江華陳鑑林最削議員
好多議員講就天下無敵，到投票議決就即刻露底。好似葉劉口口聲聲話支持基層，點知喺工人集體談判權議案投棄權票。係人定係鬼，選民自行判斷。
除咗個別議員，監察組都有同政黨埋單計數。黨員經常缺席、發言或質詢少就記缺點，出席率100%就記優點。白鴿黨最多白兔仔，有9個優點，其次係公民黨。民建聯有三個黑豬仔，主要因為劉江華同陳鑑林陀衰家，發言同質詢都係直選議員入面最削。
對於丐幫開創新議會文化，許煒斌認為，只要活動範圍局限喺自己座位，唔影響其他人，就冇問題，所以監察組贊成「舉蕉」，但反對「掟蕉」。佢亦唔贊成侮辱人哋家人或者用黑社會用語，「仆街」兩樣都唔算，丐幫可以理直氣壯繼續鬧。
立法會三大政黨成績表
民主黨
優點：9
缺點：0
公民黨
優點：6
缺點：1
民建聯
優點：7
缺點：3
資料來源：立法會議員天主教監察組