慶鈴汽車（1122）每股淨現金遠遠超過現價，多瓣業務又見增長，擺位兜一轉。慶鈴最新揸現金58億港銀，又冇負債，每股淨現金高達2.34元，慶鈴現價講緊1.38元，最新NAV3.15元，現價折讓56%，亦係數一數二折讓大嘅中資汽車股。
慶鈴折讓大，同市場嫌集團以往嘅核心業務，表現平平有關。但09年半年度（6月底止），慶鈴嚟自中型及重型車，同埋皮卡車項目嘅溢利，就分別爆升咗6倍及3倍，兼帶動埋純利增長11%到1億銀人仔。勢頭持續，市場自然會刮目相看，慶鈴折讓，唔應該仲喺咁嘅水位。
個市橫風橫雨，慶鈴再跌，以上年10月嘅支持軌1.15元入市，係咁意博翻半番到1.72元，慶鈴都未有耐上到每股淨現金值。
富豪產業續派高息
富豪產業信託（1881）最新NAV2.85元，現價1.42元折讓50%，又係有唔錯NAV折讓墊底。又富豪產託09年半年度每基金單位派息8.5仙，息率講緊挨近6厘。環球市道下半年比上半年好，加埋今年「十．一」長假效應，應該支持到富豪產託收益，兼繼續派高息，全年度預測息率過12厘唔出奇。吼實支持1.31元兜轉，博升20%到1.57元，富豪產託目標價息率仲喺10厘樓上。
錢雋