澳門格蘭披治下個月先開鑼，呢個禮拜戰火搶先出閘，仲要係人車互鬥！港車手應邀到澳門威尼斯人表演甩尾，引擎聲、響胎聲震爆場館。另一邊又有32位澳門車模擺下美女陣，引得龍友們拍個不停。不同Showoff不同享受，搞到入場人士不停兩邊走，疲於奔命。
記者：徐影龍
攝影：譚盈傑
室內甩尾，車咬車兼車咬人。
細場一樣多花式
趁住國慶加中秋咁大日子，澳門威尼斯人酒店就搞咗個「車天車地博覽會」，一次過擺齊Audi、Bentley、日產同Honda等多款歐日靚車，大會仲請嚟香港車手James同Ray，破天荒喺酒店展覽廳入面表演甩尾。一到ShowTime，隆隆引擎聲同刺耳響胎聲，震遍整個會場，場內遠處Shopping嘅人，都忍唔住嗱嗱臨趕過另一邊睇Show。
睇過James同阿Ray落Track玩飄移好多次，4、5波高速入彎閒閒哋，不過喺咁細個飄移區度，近乎齋打圈甩尾又係第一次睇，刺激性有所分別。飄移區比想像中細，無乜位衝高速度，幾乎全程靠1、2波。十零分鐘嘅表演，已玩盡原地打圈、交叉8字、雙甩尾劈彎等花式表演，兩車密集式糾纏，成日都好似「就揩就揩」咁，有驚但無險，睇到觀眾入晒神。
甩完要回魂
話晒係室內甩尾，燒胎味一定超惡頂，好彩場館地下跟平常玩開嘅柏油路唔同，Burn極胎都無乜煙出，雖然稍稍影響到視覺效果，不過就令在場人士舒服得多，起碼小朋友毋須掩住鼻睇Show。
綵排時睇James好似玩得好輕鬆，自告奮勇要求跟車拍攝。上車先知大鑊，1波起步，架Skyline已經彈射出去，唔夠半場就拉手掣甩尾，之後同Ray瘋狂左右狂甩，互相穿插，「嘩佬」放氣聲不停喪響，轉波同拉Handbrake隻手仲快過我打《街霸》。當時唔覺驚，皆因我要用全身氣力去撐實架車，就算有張賽車桶椅，離心力度依然恐怖，情形就好似玩緊富士急過山車咁，仲要騰空一隻手出嚟揸機拍攝，刺激到爆但相當辛苦。最後James原地轉10個圈收場，我一邊要Call番魂魄返嚟，一邊再強作鎮定落車，先不致如杜汶澤咁喪嘔收場。
車模貓步鬥搶
睇完咁刺激嘅甩尾表演，收拾心情欣賞車展中其他DreamCar，再「順便」拍攝車模。場中大概擺放咗50架不同類型新車，由極豪Bentley到柴油拖頭都有，一堆跑車如AudiR8、RS、日產370Z等，當然唔少得HondaJazz之類最受澳門人歡迎嘅揭背細車。由此可見，澳門地方細，但市場吸納力都幾勁。
場內仲有唔少賣汽車精品、遙控模型嘅攤位同汽車護理講座等，熱鬧度同氣氛都不俗，但最能跟甩尾表演鬥搶客嘅，都係澳門車模嘅天橋Show。32位靚女一字排開，已引得個個舉機拍照，一班龍友更猛換長短火鏡頭兼走位，務求影到與別不同嘅靚相。RacingQueen，始終係車展不可或缺嘅一環。
人車鬥靚
