這刻我被感動了！
原來官恩娜（Ella）的歌可以唱得那麼好，差點忘記她是個歌手；原來發掘新秀的地方，反過來也可以從偶像中發掘出實力派。入行6年，Ella一直忙於騷長腿賣蛇腰行性感，你只記得她由吳卓羲屋企執包袱及曾慘遭狼吻，原來佢識唱歌。跟曹格同年同月同日生，同樣在《超級巨聲》露鋒芒，但遭遇則可謂一個天堂一個地獄。等了6年終被肯定，蜜月期未過Ella已做好準備被淡忘：「講真家個感覺真係好享受，畀我回味多少少時間先啦！」
撰文：何永寧
官恩娜早前跟參賽者林志程在無綫電視節目《超級巨聲》中合唱一首《EndlessLove》充滿感情，不但令人對Ella的歌藝刮目相看，令不少看扁她的人跌眼鏡。片段瞬間轉貼YouTube，連帶她在卡拉OK跟fans聚會即興所唱的《囍帖街》也被放上網站，點擊率共達30多萬次，只敗於早前大鬧潔具店、被封為港女之首而被港聞報道的趙燕萍。
雷頌德說話好鼓舞
Ella在網上的好評如潮，被喻為天籟之音，成為在近期大肆批評歌手走音聲中的一片清泉。自言多愁善感而且眼淺的Ella表示，當雷頌德講了一句「我唔知佢唱歌咁好聽」後，即時令她不知如何反應，更差點哭了出來。之後Ella經理人公司電話便響個不停，最後當有記者跟她進行電話訪問時，Ella最終忍不住哭了出來，這口烏氣相信她已經屈了6年，Ella解釋說：「節目出街時我喺澳門做嘢，冇機會睇番。阿Mark（雷頌德）讚我其實都估唔到，所以淨係識講『唱得好有口感』同自己打圓場，嗰陣已經好想喊。到後來有記者打嚟做電話訪問，到嗰一刻我真係控制唔到，喺個電話度喊出嚟，原來開心得滯都會喊！因為佢唔係問我啲緋聞、唔係問我啲身材，係真係問我唱歌、同工作有關嘅嘢，真係好耐冇試過。其實真係好想同大家講，我真係好鍾意唱歌。」
Ella覺得雷頌德的一番話很有鼓舞作用，她說：「Mark係一位好有份量嘅監製，同屋企人或者朋友同你講『喂，你唱得好好喎』唔同。我喺度真係要好多謝佢，不過我覺得當時唔係唱得好好，可能我畀到morethanwhattheythinkthatIhave（多過他們所預期），所以有驚喜。我相信家可以做嘅就係同以前一樣，努力工作做好自己本份，其他唔好想太多。」
感恩是非中得機會
其實Ella自言很喜歡唱歌所言非假，打從3歲懂性開始她便歌不離口，在家中唱個不停，差不多要家人喊打才肯收口。唱唱唱一直唱到往英國讀書也沒有停，一有空有朋友要求她就大唱特唱，唱到身邊同學也覺得這個中國女孩子有點怪，但Ella也不介意，就是一味唱。
直至04年入行推出大碟期間還得過新人獎，原本不錯的事業對一個真的十分喜歡唱歌的人應該很不錯，但事與願違沒有人發覺Ella是唱得之人，反而焦點落在她的身材及無日無之的緋聞。對於負面新聞她似有無限感慨的說：「啲人成日話我sexy，大把人性感過我，而且我又冇身材露。又話我釣金龜，同呢個出街、同嗰個食飯。其實呢6年咪淨係影到4個男仔，唔計家影到嘅男朋友，同3個男仔食飯睇戲有幾大件事呀？但啲人就以為官恩娜係easygoing（好隨便）嘅人，對我同屋企人真係好大傷害。可能社會好多人冇獨立思考能力，人哋寫咩嘢佢就信咩嘢。」
Ella不想正面評論傳聞有否窒礙在圈中的發展，但算是經一事長一智，依然樂觀面對，她說：「呢行好多人比我勤力，我其實好懶，但依然有好多人肯畀機會我，我只可以話應該好感恩。」
唱歌好聽最佳讚美
一時是傳媒重點打擊對象，一時是萬千寵愛在一身，連一向逢報道Ella必負面的雜誌也替她做專訪寫好話，遊走天堂與地獄之間感覺可謂雲泥之別。假如沒有《超級巨聲》，情況又會怎樣？
對此，Ella有另一番見解，她說：「呢段係蜜月期啫，傳媒同觀眾係善忘嘅，好快會唔記得，其實分別都唔係太大，唔覺自己升呢喎。不過以前出街啲太太會講『你好搞笑呀』、『啲嘢係咪真係咁好食o架』，最多又係話『你好靚呀』，家啲人會講多句『你唱歌好好聽呀』，相信係呢6年聽過最好聽嘅讚美說話。暫時可以做乜嘢，老套啲講句就係繼續努力工作，但講真家個感覺真係好享受，畀我回味多少少時間先啦！」
對於她在卡拉OK翻唱《囍帖街》被指唱得好過原唱的謝安琪（Kay），更有網友提議兩人單挑，她就很得體地回應說：「唔同嘅人唔可以比較，大家演繹方法唔同，走音就邊個都會，唔可以一概而論。阿Kay係我好鍾意嘅女歌手，唔係都唔會喺卡拉OK唱佢首歌啦。」
另外，與她同樣79年7月9日出生同屬獅子座的曹格，因醉酒打人令到演唱會泡湯，她就沒有正面回應，只說：「我好少會飲醉，因為知道自己酒量唔好。」對於未來大計她只知新EP唱片會依原定計劃明年推出，會否順着熱爆氣勢推出英文大碟，一切都有待公司安排，Ella只想你們知道，她是一個很喜歡唱歌的女孩。
攝影：葉君海、黃偉雄
髮型提供：KEL@HH
後記
曾經有這樣一個傳聞，Ella出身大溪地富裕家庭，老父打本讓她加入歌星行列圓夢，當她解釋並非生於大富之家時，記者還是不厭其煩問了很多次，最後她說：「傳聞就係咁，一傳啲人就以為真，就算我同你講話唔係，你都要問多我10次。我爹哋係做黑珍珠生意，但唔係你諗咁有錢。我一入行搵到錢就不停買Barbie公仔，因為細個屋企唔會有多餘錢畀你買玩具玩，大個買番當係補償自己，你話我屋企幾有錢？到今時今日我都要養家，手停口停！」不知Ella的富裕家境，這次還要再講多久？
Ella歌聲熱爆網絡
1.《超級巨星》演唱《EndlessLove》
與《超級巨聲》參賽者林志程合唱一曲《EndlessLove》，電視機前的觀眾包括你同我大多抱着欣賞男方唱功，只視Ella如花瓶點綴，誰知大跌眼鏡。鬼妹仔Ella咬字清晰，高低音轉折處恰到好處，「騷靈」味極重，一句「唱到好有口感」，勁正。
2.歌迷聚會翻唱《囍帖街》
兩個月前上載的歌迷聚會片段，經《超級巨聲》助力下突然成網上大熱。
Ella勝在聲線較厚，聽落較有質感，而且運氣亦比曾爆肺的原唱者Kay好得多，惜唱到高音位時仍「危危乎」。
3.與張繼聰演唱《木紋》
08年遇狼吻事件後，Ella復工在黃埔舉行迷你音樂會，表現淡定，面上展露笑容，還不停與台下的觀眾揮手打招呼。
Ella與張繼聰唱彈《木紋》一曲時亦冇失準，未知身旁的張繼聰可會覺得Ella唱功更勝妻子謝安琪？
4.阿姆斯特丹演唱《戲中有氣》
07年到阿姆斯特丹登台，演繹《戲中有氣》一曲，唱live冇咪嘴。雖然是兩年前舊片，但Ella唱功已頗具看頭，特別是高音位置冇甩拖，中氣十足。
入行6年 緋聞是非蓋歌藝
01年時仍是模特兒的Ella，因拍電影《Ido》與黃浩然撻着而為人認識，但至04年才正式出道加入娛樂圈，入行6年，Ella做佈景板玩遊戲節目露蛇腰扮地獄廚神博見報，與吳卓羲一段拖拉的感情亦令她多次成雜誌封面。
04年
正式出道後Ella工作量不少，曾因在許冠傑演唱會任嘉賓之一而聲名鵲起（圖），與房祖名的緋聞亦增加不少見報機會。
05年
於04年底摘下多個樂壇頒獎禮新人獎的Ella，05年一直冇碟出，還自嘲在家中待業，偶爾拍劇，最後因拍攝《酒店風雲》與吳卓羲傳出緋聞（圖）。
06年
參加《美女廚房》被封「地獄廚神」，同年10月在屯門出席中秋晚會時遭男觀眾箍頸強吻嘴唇（圖），登上A1頭條震動全城。她與吳卓羲緋聞亦越煲越熱，多次被拍到在吳卓羲寓所過夜。
07年
吳卓羲搭上佘詩曼，撇甩Ella。同年Ella與陳鍵鋒合拍劇集《律政新人王II》（圖），遭陳鍵鋒狂寸其自度戲服「又短又透，連底褲都見埋。」雙方起罵戰。
08年
與陸恭蕙胞弟、公關界闊少陸恭和（William）傳緋聞（圖），不過最激要數她向傳媒大爆無綫有「Trip魔」非禮女藝人，弄至滿城風雨，Ella被一眾藝人指博宣傳，郭政鴻慘成「Trip魔」嫌疑犯，Ella最後被無綫雪藏。
09年
Ella承認與中法混血醫生男友J先生拍拖（圖），上月在《超級巨聲》中唱出《EndlessLove》後一鳴驚人，網上熱爆，更有人將她演繹《囍帖街》的片段放上網，大讚她唱功比原唱的謝安琪更出色。
資料來源：《蘋果》資料室
