升呢識車:畀盒人坐勁無品

升呢識車:畀盒人坐勁無品

後生仔揸車通常都懶勁懶快,最興燈位閃人,我有個朋友就係呢類,佢更經常Cut線爬頭,懶得戚話:「畀個盒你坐!」點解?咪就係令隔籬線嘅車「坐Box」,即係「走唔甩」呀。實情就係,前方有車頂住,隔籬線又同你平排,三架車成一個「L」字,令你完全抽唔到頭離開,呢個情形喺賽馬時較常見,賽車同賽馬一樣,都盡量要避免陷入Box困局。要破解一啲都唔難,輕輕收油,隔籬車自然飆前,有機會咪Cut番出去走人囉。以為困住人好叻,其實膚淺兼無品,千祈咪學。

記者:徐影龍