家幾乎所有家庭都係用薄屏電視機，但有冇留意煲碟睇戲電視畫面上下都有黑邊出現？原因係薄屏電視機嘅畫面比例16：9，而家電影製作嘅標準長寬比係2.39：1（簡單叫21：9），唔同比例，睇戲咪會有黑邊現象。
Philips最近炮製咗全球首部21：9全高清LCDTV56PFL9954H。小妹最鍾意煲碟，早幾日走去，銷售部負責人Ted話，部機有成56吋，比55吋嘅16：9電視畫面大咗20%，睇戲仲將上下黑邊踢走㖭。小妹即場試睇一段《魔盜王3》，夠晒電影感。睇睇吓，有問題噃，用Blu-ray機睇戲字幕經常會在黑邊內顯示，呢部機冇咗黑邊，咪冇字幕睇？Ted笑笑口話消費者買機會獲贈一部近2,000蚊嘅PhilipsBlu-ray機BDP7300，佢獨有SubtitleShift功能，可以字幕向上移顯示。另加送價值3,000蚊嘅內置500GB硬碟及雙調諧器高清錄影機。即使冇呢部Blu-ray機，用家可以透過電視機設定，彈番個字幕出嚟。小妹都好想買部嚟睇戲，但賣價成49,990元，要等佢跌吓價先。
電郵：mailto:[email protected]