黑天鵝教授Taleb（他力）演講，比較沉悶，主要內容係講在資本主義制度之下，犯錯者必須受懲罰，先至可以阻止過份投機，過份借貸。但現時以美國為首嘅西方世界，偏要拯救犯錯之人，極無道理，佢以花旗前董事、美國前財長魯賓為例，睇住花旗銀行搞彎晒，要納稅人打救，變相將花旗部份國營化，但魯賓仍然大剌剌咁攞走一億二千萬美元薪酬花紅，於是美國將私人機構虧損「社會化」，但與此同時，私人機構嘅利潤繼續「私有化」，如果係咁，不如行社會主義啦，講資本主義做乜！
他力教授當然唔係主張實行社會主義制度，而係要求政府不可搶救因風險管理不善而面臨倒閉嘅公司，政府應該要對啲大老闆講：「你死你事！」例如遠在列根年代，如果唔救佳士拿、援助通用汽車等，讓呢類公司死去，你話駛乜今天花咁多錢嚟搶救通用、佳士拿呢？資本主義如果只係有賞無罰，大家都去鬥搶啦！
好多人唔同意他力教授之見解，但佢領導嘅一間基金投資公司Universa去年嘅投資回報率高達六成以上，遠勝同儕。專家教授如雲之哈佛大學相比之下，去年投資虧損三成有多，搞到今年要裁員、削教研經費，睇實際嘅話，冇乜邊個可以同呢位他力教授鬥過！
他力教授不忘嘲笑啲經濟學家平時理論多多，講就天下無敵，例如伯南克、森瑪斯、蓋特納三位，做就冇厘實力，呢三位先生根本不知市場運作為何物！啲賓架更加無用，只識呃花紅，鑽營投機，不識風險管理。在場人士有不少銀行家與經濟師，聽完實在食唔落住菜。財務A之千金在史丹福大學主攻政治，副修經濟，對財務A講：「經濟學教授猛咁教建立模型（model），原來好冇趣味。」財務A問左丁山有何睇法，自己唯有苦笑，當今主流經濟學，全部數學掛帥，對高級微積分稍無認識都讀不了經濟學。數學雖然好重要，但如果全部講模型，有時未免忽略人類行為，失諸交臂，故此近年開始興起行為經濟學（BehavioralEconomics），引入一啲行為心理學概念嚟研究人之經濟行為，以後呢科可能日益重要。