本報早幾日獨家踢爆海洋公園計劃禮拜五起，將中學生團體票瘋狂加價56%之後，引起公眾譁然，其後海洋公園公關一姐即刻打電話畀八方，話佢哋內部溝通出現問題，錯誤對外公佈加價，收多咗嘅錢會退番畀學校。估唔到單嘢仲有下文。
商台行家當日想跟進，打電話嚟問八方，話向海洋公園追問加價事件，公關一姐聲稱係海洋公園同《蘋果》之間有誤會，講啲唔講啲，後經八方同商台記者講番加價事件嘅來龍去脈，商台再問番公園，公關一姐先講番十足十嘅原裝版本。
不過唔係個個行家都識得搵八方做證人，噚日有報紙話《蘋果》屈海洋公園加價。海洋公園公關一姐見玩大咗，即刻打電話嚟道歉，揚言唔知道俾人咁樣理解，佢只係話「（蘋果）內容錯咗，家冇加價」。八方想同呢位阿姐講：報紙內容冇錯，係你哋內部溝通出錯，被人踢爆加價先話暫停加價啫。
一直跟進海洋公園加價嘅議員李華明慨嘆，有咁嘅公關，唔怪得內部溝通咁大問題，搞出呢壇鬧劇，「佢咁樣同其他傳媒發放消息，明顯係想混淆不清，瞞騙加價嘅事。」