港府嘥咗183個香港家庭平均月入嘅錢，即係330萬元，製作紙紮花車，隆重呈獻畀阿爺。由於香港賀年用嘅花車，最貴都不過60萬元，好多人質疑港府浪費公帑。好在港府有人撐，江西政府就不惜犧牲國家利益，挺身而出幫港府平反。
600萬屬最低檔次
內地政府一向都視公帑開支為國家機密，花車造價諱莫如深。好似號稱34輛省市區花車中最平嘅江西花車，當局始終拒絕透露造價，但係《信息日報》扮晒揭秘式報道，獨家引述江西花車負責人熊邦勝話，一般省市嘅花車造價係600萬至800萬元，多嘅有數千萬元！
然則，香港部爛鬼花車確係一分錢一分貨，價廉物醜無可厚非。不過姓熊嘅江西友好聲稱花車造價由600萬元起，就似乎唔將香港放在眼內。八方只係奇怪，港府點解唔學吓江西政府，標榜一下香港架花車造價低廉？係信唔過地方政府官員嘅報價？定係唔方便踢爆慶典勞民傷財？