張繼聰與老婆大人謝安琪（Kay）是非不絕，卻無礙夫妻感情，反而令他們更珍惜對方，他更強調與Kay思想步伐一致。最近熱愛詠春的張繼聰，從拳法中學懂人生道理，令他有所得着，男人大丈夫應放開胸襟，現在面對負面新聞只會一笑置之。 撰文：陳寶明
張繼聰不只是一個音樂創作人，他原來能文能武，半年前他拜一代宗師葉問之子葉準的詠春門下，正式成為徒弟，更是一名標準詠春迷，電影《葉問》他看完又看。小時候已經對中國功夫興趣甚濃的張繼聰說：「讀演藝時候同學學緊詠春，佢仲教我耍拳，結果喺佢介紹下認識到葉準師傅，咁我就拜師學武。」他自言對詠春十分瘋狂，曾每周上足8堂，每一堂要兩、三小時，與一班師兄師姐練拳，有時練黐手一小時也沒有問題。
以前張繼聰覺得詠春是中國古時搏擊功夫，能保家衞國，他笑說：「習武唔係為咗一個打九個，其實詠春係一門哲學，以柔制剛，好有人生道理，外國人同中國人體質唔同，力度唔同，如果你用力打出一拳，對方痛之餘自己隻手一樣痛，但係以柔制剛，可以卸力去人哋身上，咁打出一拳只有佢痛你冇事，咁即係話只要退一步，你可以有好多選擇，既然打交都可以放開，咁做人有乜嘢唔可以放鬆？」阿聰覺得可以此比喻做藝人，譬如自以為是好戲之人，但觀眾未必認同，這樣倒不如直接投入放開懷抱演出，或許有意想不到的效果。
~我一家養緊啲周刊~
張繼聰已學了半年詠春，他覺得有很多得着，他說：「葉準師傅成日有同我講解道理，令我心情改變好多，有一次我俾記者跟蹤偷影練拳，葉師傅對我講唔好動怒，一個男人要心胸廣闊，好在我係一個樂觀嘅人。」
近期張家的負面新聞多多，都是與老婆大人謝安琪有關，最近有指Kay一人養張家十口，但他全部接收，不氣也不怒，他用幽默角度去面對：「我屋企人個個有工作，其實覺得係我一家人養緊啲周刊雜誌，用咁心態去諗會好啲。」他很多謝家人的支持，身為圈外人也體諒到他們夫婦的工作所帶來的不便，並沒有怪責他們。
~傳聞令我更懂珍惜~
雖然在這兩年內是非纏身，但阿聰並沒有與Kay討論這問題，因為傳得太多來不及討論，大家只有一笑置之。阿聰說：「冇影響我哋夫婦感情，反而更加珍惜對方，人生路上好多嘢係講緣份，我哋嘅思想到家係一致、同步，我哋嘅關係唔止夫婦，仲係好朋友，我個仔都係好朋友。」問他可有後悔太早婚生子，他說：「我冇後悔早婚，因為係我嘅計劃之內，我做事按部就班，只不過呢年啲傳聞瘋狂咗啲。」他自言傳聞歸傳聞，他們一家人還是開開心心一起吃晚飯，與一般家庭無異，當一家人圍坐一起，這是一種無限安慰、溫馨的感覺，尤其一見兒子張瞻，他覺得所受的一切不快事都一掃而空。
場地提供：詠春體育會
化妝：Eismann
髮型：Jobbyofhairpeace
力證多Jobs搵百萬
張繼聰經常被指游手好閒，入息低微，他屈指一數接了三個代言人廣告，下年接演舞台劇，為一部禁毒題材的電影擔任導演，為內地電視台的劇集擔任音樂創作及主唱，還有登台工作，明年估計有約7位數字的收入，他笑說：「或者工作唔及太太多，不過我係有責任感嘅人。」本月8日在理大舉行的音樂會，部份收益還會撥捐給樂施會。
