九月二十八日晚上，財金界大王有兩大盛會。離任金管局總裁任志剛接受銀行公會與銀行學會歡送，到港麗酒店出席歡送會，順帶發表「最後任內演說」，講吓人民幣業務，建議銀行公會設立一個獨立秘書長職位，希望銀行界與時並進，與世界標準看齊等等，當然十分得體，唔會講錯阿媽唔係女人。任總臨別仲唱一首飲歌《MyWay》，在座者無不嘆服，樓神C本身係唱K高手，居然甘拜下風。
另一邊廂，接任總裁陳德霖就到君悅酒店出席亞洲協會年會，坐在主家席，主持人陳啟宗特別介紹，射燈照住，全場拍掌，令人想起英國諺語：TheKingisDead,LongLivetheKing!「聖上駕崩，陛下萬歲！」
左丁山冇資格參加銀行公會晚宴，只不過樓神C事先問左丁山去唔去，先至打聽到消息啫。財務A就客氣，請左丁山出席亞洲協會年會，見佢間公司嘅大老闆董事長L。七點幾入到君悅，只見人頭湧湧，握手都握唔切，原來筵開四十八席，逼爆宴會廳，在場者除大量財經工商界人士外，還有好多外國領事，而且陳啟宗為提拔後進，每年例牌邀請本港學生代表到場，睇落有三十幾人，來自六間大學（中大、港大、科大、城大、理大、樹仁與兩間中學，聯合李寶椿，聖保羅男女），等啲學生有機會見識吓。
每年有一個重量級演講嘉賓，今年講者就係《TheBlackSwan：TheImpactoftheHighlyImprobable》嘅作者ProfessorNassimNicholasTaleb，講題係"TheElephantintheroomisstillthere"，呢位他力教授因為金融海嘯而聲名大噪，本書翻譯成三十一國語言，售出一百五十萬本，《黑天鵝》因而成為金融人士嘅口頭禪。世上多見白天鵝，黑天鵝絕無僅有，倘偶然見到，一定係預想不到，全憑偶然機會嘅。故此他力教授筆下之黑天鵝事件就係無法事先預測嘅偶發事件，最佳例子就係金融海嘯。他力教授係Wharton嘅MBA，巴黎大學博士，黎巴嫩人，本是期權交易員（optiontrader）後成投資專家、基金投資顧問。名氣就大嘞，著作十分暢銷，不過嚴格嚟講，佢嘅演講口才差過陳啟宗好多，講得幾悶吓，如果唔係佢有本暢銷書與投資成績輝煌，搵四十八人聽佢演講都難。