上月燈神
8月喺擂台長坐榜首，同牛兄鬥得火紅火綠，最後俾佢爬頭做盟主。事隔一個月，畢傑無啦啦做咗燈神，諷刺係《畢賭翁》連贏7期，落注單頭不嬲最有信心，上月過關腳揀得唔好，整定擂台蝕水收場。
過去一個禮拜，生活過得好充實，先喺士碌架單打決賽，以局數3:1擊敗名氣球手宏哥；決賽賽制好特別，共3支團體隊玩「落水人」方式定冠軍，所以仲要打多個回合，計埋得失局數同雙打戰績先知。攞唔攞到個人首個士碌架錦標，遲啲再同大家分享。
近期又同幾位老友開枱，打吓衞生麻雀，當有鋪包蘇康十二章清一色，佢竟然選擇單吊東，我梗係樂意輸三番。轉頭輪到佢包番我鋪清一色，又係十二章，經我右手一甩兼冷靜一聲海底撈月，四索唔該晒。唔同嘅叫糊方法有唔同下場，又上咗寶貴一課。
本欄向住連開8個W邁進，拉科平手盤冇得輸，頂多開D斷我連勝路。
畢傑
近5場往績：WWWWW
讓球：拉科魯尼亞（平）
心得：特內里費邊有咁多貨？