愛隊輸波只好怨技不如人，唔應該衝入場打人，位於中美洲嘅危地馬拉聯賽日前就發生「狂迷」衝入球場追打球證事件。呢件事奇異之處係「打手」全部好似電影《奪命狂呼》嘅殺手咁戴晒面具，呢班killer衝入球場源於球證魯賓喺完場前判咗個12碼畀客軍希里達，當時希里達同主場嘅聖卡洛斯大學隊打成1:1平手，就喺判決一出後，一班戴面具嘅「打手」就追打球證，可惜魯賓唔係《蝙蝠俠》入面嘅「羅賓」，走得無咁快之下畀狂徒瘋狂追擊。最慘仲係旁證韋遜，坐喺地都要畀狂徒踢多腳，結果全身俾人打咗30拳兼有24處傷口，球證真係唔易做呀！