我求大俠早兩日先喺本欄，讚完曼聯中場傑斯越老越可愛，點知呢位35歲老將可能嫌唔夠喉，實行以表現博上頭條。紅魔啱啱喺歐聯B組主場反勝禾夫斯堡2:1，傑斯佬以隊長身份又入波又助攻，累積計幫曼聯入咗150球！某大銀行周四都出咗張150元新紙幣，反應麻麻；我求大俠覺得不如整張「傑斯150」新紙幣，咪仲有紀念價值！
話說周三歐聯，曼聯即使有史高斯喺聯賽坐完波監，但呢場波都只能長坐冷板，完全冇機會出場。點解呀？之唔係有球壇長青樹傑斯大勇囉！傑斯佬大大話話都夠足35歲，上場聯賽對史篤城後備入替，即刻交兩個靚波畀貝碧托夫同奧沙建功，結果贏2:0。
助曼聯2:1反勝禾堡
87年起效力曼聯嘅傑斯「弗」自然贏盡領隊費Sir歡心，呢場歐聯又正選上陣兼踢足全場。禾夫斯堡先憑迪施高頭槌頂入領前，但有傑斯領軍嘅曼聯點會咁水皮；呢位球隊忠臣先喺59分鐘罰球扳平（呢球係效力曼聯第150球，同雲尼斯達羅並列紅魔榜第8位），再喺78分鐘回傳卡域克妙射搞掂，結果反勝2:1保住1.28倍單W。家陣紅魔喺B組兩戰全勝排榜首，奪標賠率以7倍成第4熱門。
賽後費Sir都忍唔住大讚傑斯：「傑斯盡顯佢嘅年輕，我望住佢，就等如睇番佢啱啱職業生涯開始嘅時候；以佢嘅精采表現，都唔知要讚幾多次先夠！傑斯會繼續保持到好似個後生仔一樣，我哋放長雙眼去睇啦！」
奧雲受傷又要唞3周
呢邊有傑斯「弗」到漏油，轉個頭前鋒奧雲因鼠蹊受傷，賽後證實要唞3個禮拜，肯定無法喺周六英超主場對新特蘭時上陣。費Sir賽後講吓奧雲：「周日操完之後，奧雲話整親鼠蹊，周二畀佢休息一日諗住冇事啦，點知歐聯場波賴嘢，咪即刻換佢出場囉。」話時話，周三歐聯特別多人傷，除咗奧雲，皇馬嘅C朗同拜仁嘅洛賓又傷咗，呢個周末可能齊齊休戰都未定。