當代最出色的時裝設計師Martin、Christophe、Yves及Oscar，於10月10日齊集香港出Crossover？嘩！潮友一聽便知屬時裝界大事件。究竟邊個咁有power，可以拉攏四位名師聯手呢？原來，得到如此天大面子的是——時裝枕邊人黃偉文（Wyman）。
記者︰吳美美
攝影︰梁細權
黃偉文愛女裝之餘，更動手設計高踭鞋。
最愛估不到
Wyman與時裝品牌聯手設計出product，並不是甚麼新鮮事，一個熱愛時裝的人，不將自己袋了落袋的時裝idea拿出來與眾同樂，怎說也講不過去！但一個對自己有要求的人，不會經常做些讓人估得到的事，Wyman就是如此的一個人。
今次，PedderRed就讓人估不到地，邀請Wyman設計高踭鞋，對，你無睇錯，是女人着的高踭鞋，總共設計四款，都以他敬重的設計師命名，靈感就是來自四位當代具影響力的設計大師─MartinMargiela、ChristopheDecarnin、OscardelaRenta和YvesSaintLaurent，集合四人上身得出來的結果。作為男士，Wyman選擇設計高踭鞋是真的讓人估不到，「PedderRed約我傾project，去之前都估究竟會做甚麼呢？以我自己的案底嚟講，我估都是做波鞋或者男裝衫，最多都是設計首飾，但結果是高踭鞋，而我亦即刻應承，因為我好鍾意估唔到，反而如果叫我做頭先我所講嘅嘢，我會覺得無乜趣味。」
先踭奪人
對對對，趣味很重要，特別是身為客席設計師，首要任務是將自己最易認的一面，放入自家設計之中，讓人離遠看便知「呢對係×××設計嘅！」而Wyman今次以「換衫公仔」作概念的設計，以鞋踭作主要的創作平台，更將一件件小型晚裝（小記覺得像是音樂盒中的公仔），放入鞋踭之中，先踭奪人，眼球輕易被定型。不如，來聽聽作者簡介，「其實點解釋呢幾套呢？例如一套tux，是一套好遠一望就知道係咩，以及好有代表性的造型，而紅色晚禮服嘅紗裙仔，亦都係一望就知道係乜。其實呢個就係第一個會選擇嘅原因，因為有太多可能性可以做。如果你只係做啲微型衫仔，乜嘢牌子、款式嘅衫你都可以做，所以，咁遠距離都可以望到，一睇就知你嘅笑話趣味係乜，就先想了呢幾樣，先再想邊一個設計師做呢幾樣最有代表性。」
再設謎題
作為成功創作人，思維上必然與人不同，Wyman思考方式亦非平庸，「我自己就喜歡將完成的事情從頭再看一次，一些太順理成章嘅事情，去到最後，需唔需要打爛原先的pattern再從頭嚟過呢？所以就從反方向諗，不如試試拎走批衫，究竟會點呢？咁就有第四對，阿Martin嘞！所以成個思考方法就係咁樣，結果就係呢幾位設計師入選，而唔係其他設計師入選嘅原因。」
有看過Wyman的時裝專欄，都留意到他很喜愛叫讀者猜謎，而今次推出高踭鞋，又像是出了一個謎題。有了下身，上身又應該點襯呢？「我心裏面係有個腹稿，即係有個modelanswer，但係我又唔係好想講，因為會限制大家嘅想像力，所以大家不妨買咗着咗，然後影張相，send去我e-mail，大家每個星期日睇《蘋果日報》都知道我e-mail係咩，結果俾我睇吓你襯咗啲乜嘢。咁有時係我想像唔到，最好係我想像唔到o架啦，我期待呢一刻。」
發售日期︰10月10日（數量有限，售完即止）
PedderRed（21183712）
中環威靈頓街64-66號
後記……
訪問至最後，問問Wyman被邀請做鞋後，又有沒有意思做埋時裝呢？得出以下答案︰
「從來都有意思做自己嘅品牌，但係我呢個人呢，我又要舉呢個例，即係如果你約我，我一定準時，但係你如果見到我只係講句下星期食飯啦，咁你唔打嚟講星期二星期四定星期六，係八點定九點半，咁我就會懶懶閒，四年後都未食到飯。
咁關於做時裝，呢幾年嚟都同過唔同嘅合作單位，坐低傾過，然之後大家都傾得好地地，話可以開始，但就缺乏咗好有條理嘅惡佬或者惡婆，定時定候打電話嚟推我，咁所以結果就無事成到。咁今次合作的夥伴，就好有規律，定時定候打電話嚟，咁所以我需要嘅東風，我欠缺嘅嘢，就是咁樣嘅合作夥伴。
咁如果有人有興趣想同我做時裝，請自備惡婆一個呀唔該。」
品牌們，收到啦！