日前飛咗去台灣宣傳全新國語專輯《上五樓的快活》嘅陳奕迅（Eason），噚日到台灣一間BBQ燒烤店同歌迷聚會，雖然只有幾名獲勝可以親近Eason嘅歌迷喺現場，但Eason好識做，除咗親自燒嘢食畀歌迷外，又應女歌迷要求餵佢食嘢。
嗰名女歌迷仲借意摸Eason嘅腰，但Eason就冇乜理會，仲喺現場掛住偷食嘢，點知唔小心辣親手指，佢仲不自禁爆咗句廣東話「瀨嘢」，笑爆全場。
中秋返屋企
事後Eason接受訪問時話中秋節可趕及返香港同家人食飯，仲賣口乖話同屋企人食飯係最開心同最舒服嘅。提到愛女陳康堤，Eason更加變咗開籠雀，大爆愛女嘅笑料，佢話：「我個女好難捉摸，佢一時話我靚仔，一時又話我醜，佢有啲分裂，但好funny，佢有時仲話媽咪肥，總之日日都唔同，好搞笑。」
成個慈父樣嘅Eason仲覺得愛女長大後會令到異性好麻煩，記者笑佢個女嘅異性緣好過佢時，佢即刻搶住話：「唔係，我異性同同性緣都OKo架。」