轆Book:TVRTuscanSpeed6 玲瓏浮誇

轆Book:TVRTuscanSpeed6 玲瓏浮誇

男人睇車當睇女,流線車身固然重要,但浮誇出位對男人嚟講絕對係多多益善,出街搶眼等於幫自己爭回不少面子。好似TVR架Tuscan咁,應圓地方就圓,應凸嘅又夠凸,拍攝時Model瞓上玲瓏浮凸嘅車頭,兩者「S」完美配合,曲線美感出晒嚟,就算見慣大場面,都不期然怦然心動。

記者:徐影龍
攝影:林栢鈞
Model:Asa@ColonEntertainment

落車開篷

乜嘢係「手動式」硬頂開篷?TuscanSpeed6又讓你開開眼界,開篷,就係走落車將篷頂同車尾玻璃拆落嚟,再擺晒落尾箱!不過都好過以前啲舊款SL同MX-5咁頂篷拆咗無位跟車,要安置喺車房,出街前要決定「今日開唔開篷好呢?」

■篷頂要自己郁手拆,不過唔算重,基本上一條友都搞得掂。

波浪車頭勁搶眼

TVR旗下車系一貫浮誇,總有本事令人「嘩嘩聲」。可惜香港無代理,港人要親身體驗,睇嚟都只有打賽車Game。今日都係偶然之下,先得以一睹TVR嘅真身。落到名車滙,全場過百林寶波子都唔及TVR架TuscanSpeed6搶眼,低矮車身配特長車頭,全身充滿大弧度波浪曲線,加埋左右各三盞大中細圓頭燈,難得在全車圓潤仍然具有超級跑車風範。最獨特之處在於長長鬼面罩,入氣位承接圓形概念,一個個窿似足鬚刨頭,真係有本事剃盡各式古怪騎呢車種嘅眼眉。最緊要TuscanSpeed6喺香港夠罕有,開埋篷喺銅鑼灣塞吓燈位,真係全街哄動。雖然呢架係2000年二手車,但以放盤價34萬有找嚟計,搶眼程度絕對值回票價。

■開篷後好有90's英式跑車風味。

■三幅式賽車軚盤,背後個錶板着燈後,又係型到爆。

無輔助系統考你技術

九年前嘅TuscanSpeed6個款睇落一啲都唔過時,不過骨子裏賣嘅係賽車原始風味,唔係個個舞得掂。操控有難度並非指佢五速棍波,以及重極力子跑車特色,相反油門、腳掣等,都用上Racing嘅直立式,易收易放,最考人功夫係無晒時興嘅電子輔助設備,莫講話循迹系統、電子油門,連ABS同風油軚都欠奉,經驗少啲嘅,揸住佢分分鐘俾佢玩番轉頭。就好似西部牛仔享受馴服蠻牛嘅滿足感。

■呢個氣泵唔係用嚟噴相機鏡頭,而係吹脹椅背,等你坐得舒服。

■中控台崇尚簡約,無乜Function但Design贏晒。

■TuscanSpeed6為TVR早期車款,事隔九年依然充滿科幻味道。

規格

引擎:3,996ccDOHCS6
馬力:360hp/7,000rpm
扭力:420.3Nm/5,250rpm
傳動:5速手動波箱
二手價:$338,000
查詢:FormulaWon(31102718)