新中國60周年國慶，踏入10月，金融市場亦將迎來另一個高潮，籌備逾十載的中國創業板市場將正式面世，首批10隻手指啱啱數得晒。適逢其會，財政部於國慶前搶閘宣佈，個人炒股炒滙等金融產品免徵營業稅。
早前深交所更為創業板可能出現的極大波幅而新加入停板機制，新增股價上市當日升/跌80%便停牌至收市前3分鐘規矩，目的在於進一步防範和控制交易風險，維護市場秩序。
以首批創業板上市的10間公司來說，最少40倍的市盈率，明顯已高於中小板，部份超額認購逾200倍，反應尚算唔錯。10公司於國慶長假期前總共凍結超過7800億元（人民幣．下同）資金，足足係A股流通市值的8%，將市場游資抽得一乾二淨。
中籤率低望脫破底厄運
不過睇真啲，呢10粒明日之星加埋集資唔夠67億元，已比招股書中預計集資額超出一倍，平均每間抽水7億元，彷彿係人人有份永不落空的抽獎活動。按A股10萬億元流通市值計，呢10顆星所佔份額連0.1%都冇，卻凍結市場近十分一資金，可見基金大戶無懼新股破底的壞先例。
不過，破底機會睇嚟唔多似，因為喺純炒供求角度看，這些創業板公司背後都係由一眾創投公司湊大，加上有禁售期，一時三刻又點派夠貨而全身而退？據內地媒體統計，背後每間創投基金平均賬面回報超過16倍，投資期由3至33個月不等。大贏家要數以60倍PE上市的樂普醫療，創辦人蒲忠杰估計賬面狂賺17億元。
以首批創業板公司中籤率只得1%來看，上市首日炒風能否扭轉最近新股「笨豬跳」的頹勢？目前網上調查顯示，只有12%投資者打算首日放售圖利，說明兩樣嘢︰一係散戶根本冇乜貨喺手；二係大戶都分唔夠貨。
仲要留意邊類股份跑出，睇有冇影子概念。目前以醫療、醫療器材、生物科技、電腦軟件等最吃香，當中北京神州泰岳軟件未上PE已定於近70倍，認真進取；而最多散戶入飛則是安科生物，貪佢做激素的業務簡單易明。
胡孟青