曾俊華司長平時愛好運動，打詠春，玩洪拳，練劍擊，一個星期唔止運動兩小時，超過醫生要求嘅最低運動時間，兼且身為高官，每年有定期身體檢查，點解會發生急性心臟病，送院時一度危殆，要即時進行緊急「通波仔」手術呢？好彩曾司長吉人天相，入院及時，能逃過一劫，我地普通打工仔一無定期驗身，二無定時運動，三無教授級醫生即時照顧，碰上心臟病發作，好容易就會去見馬克思嘅噃，咪話唔驚。
既然曾司長都染上此症，即係話人人都有機會染上此症，我地不可不防。因曾司長之病，想起二十幾年前一位今天財金界大名人，四十幾歲時某晚吃完豐富肥美潮州菜，返到屋企就跪低，即晚送院，搶救之後無大礙，一個星期後就飛去史丹福大學做通波仔手術，休養幾個星期後回到香港，佢就告戒左丁山：「嗱，一不要食煙，二不要一日飲幾杯o架啡，三不要食太鹹，四不要成日坐長程飛機飛來飛去。史丹福大學教授話畀我聽，如果你做齊呢四樣，年過四十之後，患上心臟病就似染上感冒咁容易！」
好彩四樣嘢都唔啱自己，但第四樣，坐長途機，就不一定係由自己作主，做投資銀行家最興飛去倫敦跟住飛去紐約，開完會，見完客就馬不停蹄咁直飛香港。睇一位專家講過，長途飛行對心臟有壓力，唔好以為好好玩。呢次曾司長飛去多倫多，轉飛匹茲堡參加G20會議，再由紐約坐直航十六小時回港，正一舟車勞頓，故此一落機返到屋企就出事。
賓架P來電話：「以曾司長為鑒，我就驚驚地，呢個月我都飛咗好幾日。我地老友賓架C以後唔做亞太區主席，改任中國區董事長及台灣區主席，以後唔駛飛完印度就去澳洲，跟住北上日本，你話幾好呢，賓架C已經六十一歲，坐飛機少啲，對佢身體會好啲！」左丁山有同感，集中精神管中台，賓架C有比較優勢，更有實效，一個唐人主席飛去印度視察業務，只係做公關而已！
（作者按：一位讀者來郵話博士未必係教授，教授卻多是博士，一個人稱為Prof.Dr.，十分奇怪。不可不知，此乃德國式寫法，德國有好多博士，如兼係教授，就會叫Prof.Dr.，一啲就叫HerrDr.即英文Mr.Dr.）