已故慈善家何伯次孫何定國喺加拿大涉嫌禁錮妓女，現保釋候審，呢單案震撼加、港，當地傳媒報道，指何定國只係想幫助妓女，古道熱腸卻被誤解。原來何定國係「加拿大紫藤」，真係令人意外。
報道形容何定國「煙駁煙」，而且受嚴重失眠困擾，每星期瞓少於10個鐘頭，當佢眼光光等天光，就會靜靜雞去街搵流鶯，目的係伸出援手，尤其係雨天，喺街頭搵食妓女好慘，所以佢會揸車去接濟，有時仲會請佢哋返豪宅留宿，唔使淪落街頭。
畀11萬元睇牙醫
施恩莫望報，何定國話幫助妓女不問年齡、樣貌，因為佢對於拯救流鶯已達沉迷地步。接近何定國人士為佢抱不平，指何定國過去6年一直低調幫助妓女，曾經開出15,000加元支票（約11萬港元）畀妓女睇牙醫，又幫佢哋脫離火坑，仲每月提供助學金。
何定國仗義事迹不止於此，又試過幫一個大學教授搵番個女，呢啲事本來冚得好密，如果唔係爆出涉嫌禁錮案，都唔會揚晒出嚟。