近日城中話題真係多，其一係中共建政60周年，全國山河一片紅，可喜可賀。另外，金管局總裁任志剛榮休，股場好多散戶都唔捨得佢！不過，咁多事發生，似乎點都唔及呢一件最影響散戶心情，就係新股崩盤潮！近期連續幾隻新股首日上市都穿招股價，昨日輪到華南城（1668），股價低開近三成，成為今年首日表現最差新股。
港股受國慶假期氣氛籠罩，昨日跌幅不大，只跌57點，收報20955，成交唔夠500億元。個市咁搞法，真係唔知10月港股點走。
今日北京閱兵，所以唔少人嘅焦點都會放在北京，何妨望望隻窗口公司北京控股（392）。睇番北控在9月初由低位36.50元炒上，升至月中高位43.50元，表現算係唔錯。不過，近期股價失守10日線後疲態漸露，昨一度失守20日線（41元），低見40.75元，收市跌幅略收窄，報41.05元，跌0.55元。由於大市市況一般，預料北控弱勢持續，建議跌至36元至38元範圍才考慮吸納。
北控業務多元化，包括天然氣、水務、啤酒，以及收費公路，上半年純利增11.4%，達14.2億元，其中天然氣及啤酒業務係主要收益來源，由於業務穩步增長，中長線投資有一定吸引力。
方星俠