中央政府經常話要建構和諧社會，成日叫香港人「愛國愛港」，自己最終卻連「老愛國」飛哥都容不下，將飛哥踢出十．一訪京團。
《蘋果》前日報道，飛哥老友馬丁都對呢件事非常睇唔過眼，指事件反映中央只願接受「絕對奴才」。實情馬丁前日所講嘅，係指今次飛哥事件，好值得一眾左派人士警惕，反映原來幫共產黨做嘢嘅人，必須完全聽話，阿爺至會收貨，唔係話名單中人都係「絕對奴才」。
馬丁前日引述一名熟悉內地嘅朋友一番說話，指如果有人想幫共產黨做嘢，有做奴才嘅心態都未夠，要有做「絕對奴才」嘅心態至得，馬丁覺得好有同感，認為香港日後絕對唔應該行呢條路。