為旅遊飲食週刊做了一輯封面，廣州特輯。
事後被老友駡個狗血淋頭，「有冇搞錯，間太平館（廣州）食物爛過香港盒飯外賣水平，你介紹得落手……？」
What？What？滿頭霧水。
「買了閣下狗頭做封面嘅Guide，捧着到廣州嘗美味，但時髦西餐百年太平館太不知所謂，海鮮忌廉湯冇海鮮蹤影不特止，無忌廉感覺兼凍，連號稱百年招牌焗雪山也未及水平……陰功，門口還有一條捧着雜誌摸上門候吃的長龍，要拆你招牌啦！」好彩自己不是食神飲仙類別，非賴以謀生，頂多是一名十分為食的路人甲、乙、丙……
事實封面人物是我，但內邊介紹也非全為在下推介。記者姐姐也很辛苦，懷舊之旅在內地還不太難做，懷舊飲食，就是三十年代號稱十里洋場的上海，舊時建築物可能仍完整留下，可過去好食名店？經歷近半世紀革命洗禮，老早不留痕，雖然以「太平盛世」不斷洗底期望「冇，咩嘢都冇發生過！」。「食在廣州」是舊時威煌，今天也有十分不錯的美食，但懷舊食店？滄海桑田，浪淘沙。
不過老友認為花園酒店「荔灣亭」，百年古院「一壺樓」純飲茶，龍津東路「向群」，水盆糕，牛初乳，西關瀨粉等都名不虛傳，好彩；一壺樓及向群真正是我的推介，執番幾錢面子。