自問勁愛麪包超人，奈何屋細又無錢，頂多只有一小箱收藏品。今回訪問同道JenJen，闔家三口都是粉絲，一屋上下數不清，還有另一頭家才放得下戰利品，閒閒哋有過千件麪包產品。訪問前還特地請求JenJen盡情晒冷，展示最瘋狂的一「麪」，點知，打開門一屋日用品都是，一眼看去，竟然連囝囝個樣都有幾分似麪包超人，呢吓先至叫Die-hard。
記者：林佩婷
攝影：譚盈傑
15年前首買戀愛餐車
JenJen全家都愛麪包超人，但講到最狂熱要數她先生。「老公細個已好鍾意食嘢，睇卡通見到麪包超人用紅豆包做，又成日為咗救人俾人食個頭，就好鍾意，不過細個點鍾意都好，都無錢買！」15年前，兩人拍拖，而且開始投身工作，「有日佢買咗架麪包餐車送畀我」，簡單一句就展開兩人愛之旅跟愛儲麪包超人之下半生。
囝囝催化買到拎唔到
從香港水貨店、轉戰網上、到按捺不住飛身日本尋寶，至3年半前囝囝Hadrian出世把購買意欲推上高峯。凡是相關大型玩具、擺設統統搬回家，城堡、滑梯、鞦韆、電動車、冲凉玩具、燈飾、廚具、墊褥、益智圖書、聖誕樹、屎塔、尿片……不能盡錄。
每年最少去日本一兩次，例必到麪包超人博物館朝聖。「最勁係上年到博物館，買到拎唔到，起碼10大箱，使成三、四萬。除孭晒上身，BB車都載滿，阿仔反而要拖住行，落到地鐵啲人係咁望住。」
進軍教材 送舊迎新
隨着囝囝長大，現在則首選有教育意味的麪包超人，可他們說這類型產品非常難找，但記者影相時JenJen又能如數家珍：「呢本書教小朋友冲凉如廁、呢幾隻DVD教英文同數學……」
通常發燒友對珍藏相當重視，但JenJen卻會將不合穿的衣衫、甚至是滑梯等大型家品送給Hadrian表弟或親友，她的格言是「不送人又怎買新貨」。又原來床單跟窗簾這些普通不過的家品最難買，「另外我喺日本睇中架成人單車，點知老公死都唔肯俾我買，話唔想拎咁重。」最後看來是媽咪較爹哋變得更瘋狂呢。冒昧問句多年來花了多少錢？JenJen超級茫然話買時從不看價錢，咁都得？
