中央安排嘅國慶觀禮團益晒自己友，好多人只能望門（天安門）興嘆，自責唔夠紅同唔夠聽話。一向紅到發紫嘅曾憲梓都唔喺觀禮團名單上，當然唔係同飛哥同一命運被踢出局，八方聽聞曾常委早前接到觀禮邀請時，已經即時以健康理由婉拒，因為要企喺天安門成四、五個鐘，未必捱得住。曾憲梓今日留港睇電視直播閱兵，由阿仔曾智雄代表曾家上京。
民建聯立法會議員人人有份北上，獨欠新丁李慧琼。佢唔係俾中央排擠，係自己棄權。原來Starry早前去咗法國交流，前晚好夜先落機，噚日仲有jetlag，為免上到北京冇精神甚至頂唔住，所以一早話咗唔去。冇得參與閱兵儀式當然係有啲可惜，但佢話抽番啲時間陪屋企人都值得。