嫁入豪門前已是圈中富婆的李嘉欣，昨日和o靚模爭飯碗，亮相電玩活動。婚後繼續密密搵錢的李嘉欣，自爆拍了5個廣告，收入可觀，她口中「所謂的家用」就捐做慈善，更代夫宣佈沒有兒女冇相干，毋須等她繼後香燈，招積兼繼續晒命！
手提電玩PSP推出PSPgo新作，平日活動專找性感o靚模宣傳，昨日卻找來現年39歲闊太李嘉欣出席。李嘉欣不認搶飯碗，更自爆近月在內地拍了5個廣告，市場價值都和o靚模不同。
李嘉欣一向是圈中富婆，收入可觀，老公許晉亨豈非可以不用給家用？她聞言即驕傲說：「我一部份收入，同一部份所謂嘅家用，都係捐嚟做charity，呢啲（廣告收入）係bonus。」月捐100萬？她說：「咁又冇咁多。」
「有冇都冇所謂」
問李嘉欣造人大計進展如何？她說：「我生活過得好開心，日日開心快樂，我可以代表另一半講：有冇都冇所謂。」之前傳她今個月赴美人工受孕，她即時否認說：「冇件咁嘅事，我結婚唔係為咗要生，我結婚係將來一齊開心咁生活，唔係為下一代。」即沒繼後香火的壓力？她招積說：「呢啲唔使等我喇。」
提到中秋，李嘉欣謂因婆婆生日，要一晚走兩場，問她有否下廚煮兩味？她晒命說：「Actually我先生有好多大廚，唔需要我虐待佢，我都有煮，煮啲餃子、蒸蛋同意粉，佢話好味，我都相信呢個事實。」
預早知黎明結婚
舊愛黎明和樂基兒已結婚，李嘉欣謂已恭喜過黎明，她說：「我知先你哋少少，早你哋幾個月啦。」有否跟黎明慶祝？她說：「我識做，人哋唔鍾意高調，唔通我高調同佢慶祝。」她更大讚樂基兒是好老婆。
採訪、攝影：RitaLeung
